100
Nr. 68. Tütar ema haua pääl.
A.
Tulli ma üles hummogul,
Varra inne valge'et,
Mõzi ma suu, suie pää,
Käng'e ala au-jala',
Pääle liid'e lemme-seere',
Lätsi ma lauta kaema,
Karja lauta laskemahe.
Kuuli ma käo kuukuvat,
Laane linnu laulavat,
Mõtli ma imä hõikuvat,
Armu üles ajavat.
Ega no's hõigu imäkene,
Aja üles armukene,
Tuo no kuugi kunnu tsirku,
Lauli laane linnukene.
Saadi ma karja kannistuhe,
Vazika' Vaze mäele,
Säält ma karksi kalmu teele,
Säält ma lintsi liiva teele.
Üles ma kaksi kalmu kaane,
Üles liid'e liiva havva,
Näi ma imä ilozat liniket,
Vele verevät kübärät,
Sõzare sõba päätit.
Tule no üles, imäkene,
Aja üles, armukene!
Tule liivast, lövvä nõvvo,
Tule kalmust, kanna huoli,
Lövvä nõvvo linikist,
Kanna huol' kaputist.
Tütär, hella linnukene,
Madalikku marjakene!
Mull om man maa haizu,
Suu man surma haizu.
Imäkene, helläkene!
Ma tie sulle kolme' lipe',
Üte tie lipe linnuhkist,
Tõize tie make maazikist,
Kolmanda tie kure-marjost,
Mõze sull mant maa haizu,
Suu mant surma haizu.
Tule no üles, imäkene,
Aja üles, armukene!
